ព្រះអង្គ ប៊ុត ប៊ុនតិញ អំពាវនាវដល់លោក ហ៊ុន សែន កុំយកជាតិមកភ្នាល់គ្នាធ្វើជាល្បែងនាំតែអន្តរាយ

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការលើកឡើងបែបឌឺដងដាក់លោកនាយករដ្ឋមន្រ្តី ហ៊ុន សែន រឿងរកមនុស្សណាដែលហ៊ានភ្នាល់ជាមួ យនឹងលោក «១ស៊ី១០០» លើករណីរំលាយគណបក្សសង្រ្គោះជាតិ ។ មេដឹកនាំកំពូលរបស់រដ្ឋាភិបាលនៃគណបក្សប្រជាជនកម្ពុជា គឺលោកនាយករដ្ឋមន្រ្តី ហ៊ុន សែន បានថ្លែងលើកឡើងថា លោកត្រូវការរកមនុស្សមកភ្នាល់ជាមួយនឹងរូបលោក ករណី១ ស៊ី ១០០ ចំពោះ ការរំលាយគណបក្សសង្រ្គោះជាតិនេះ ។ លោកនាយករដ្ឋមន្រ្តី ហ៊ុន សែន ថ្លែងអោយដឹងយ៉ាងដូច្នេះ ធ្វើឡើងនៅក្នុងពិធីជួបជាមួយកម្មករកម្មការនីនៅតំបន់ចំការដូងខណ្ឌដង្កោ រាជធានីភ្នំពេញ នៅព្រឹកថ្ងៃទី៨ ខែវិច្ឆិកា ឆ្នាំ ២០១៧ នេះ ។ ថ្លែងនៅក្នុងពិធីជួបកម្មករនាព្រឹកម្សិលមិញនេះ លោកនាយករដ្ឋមន្រ្តីជាង៣ទស្សវត្តន៍រូបនេះបានថ្លែងអោយដឹងថា មានប្រជាពលរដ្ឋដែលជាអ្នកនៅតាមហាងកាហ្វេមួយចំនួន ពួកគាត់កំពុងតែធ្វើការភ្នាល់គ្នា ករណីរំលាយគណបក្សសង្គ្រោះជាតិ ដែលជាគម្រោងការររបស់រដ្ឋាភិបាលគណបក្សប្រជាជន ។ ហើយចំពោះលោកវិញអោយតែហ៊ានភ្នាល់ គឺលោកនឹងភ្នាល់ភ្លាម ។ លោក ហ៊ុន សែន បានថ្លែងបញ្ជាក់អោយដឹងថា លោកហ៊ានភ្នាល់គ្នា ១សងវិញ១០០ បើសិនជាមិនរំលាយ ឲ្យទៅយកលុយពីលោកដោយផ្ទាល់តែម្ដង ។ ព្រះអង្គ ប៊ុត ប៊ុនតិញ ដែលកំពុងមានព្រះវត្តមានគង់នៅលើទឹកដីនៃសហរដ្ឋអាមេរិកនៅឡើយនោះ មិនបានមានព្រះថេរដីការច្រើននោះទេលើករណីនេះ ប៉ុន្តែព្រះអង្គចាត់ទុកថា នេះគឺជាល្បែងនយោបាយរបស់អ្នកនយោបាយប៉ុណ្ណោះ ។ ព្រះអង្គបានបិណ្ឌបាតថា កុំយកជាតិមកធ្វើជាល្បែងភ្នាល់គ្នា លែងអី ។ ទន្ទឹមនឹងនេះ ព្រះអង្គ ប៊ុត ប៊ុនតិញ ក៏បានអំពាវនាវបិណ្ឌបាតដល់ពលរដ្ឋខ្មែរដែរថា កុំអោយចូល លេងល្បែងនយោបាយដែលគេកំពុងតែលេងនេះ ប្រយ័ត្នមានបញ្ហាកាន់តែធ្ងន់ថែមទៀត ។ ព្រះ អង្គបញ្ជាក់អោយដឹងបែបនេះ ៖ « កុំយកជាតិមកធ្វើជាល្បែង ហើយកុំលែងល្បែងជាមួយពួកកាន់ អំណាច » ។ តាមរយៈវីដេអូឃ្លីប ដែលធ្វើឡើងកាលពីយប់មិញនេះ ព្រះអង្គ ប៊ុត ប៊ុនតិញ លើកឡើងបញ្ជាក់ទៀតថា នេះគឺជាទង្វើអាក្រក់ដែលចង់យកជាតិរបស់ខ្លួនឯងមកធ្វើជាល្បែងភ្នាល់គ្នា ។ព្រះអង្គបានបញ្ជាក់ ថា ពលរដ្ឋខ្មែរគួរជៀសចេញពីល្បែងបែបនេះ ព្រោះមិនចំណេញដល់ជាតិសោះឡើយ ៕