លោក ហ៊ុន សែន ៖ បងប្អូនមានពេល៨ថ្ងៃទៀត ដើម្បីមករួមរស់ជាមួយបក្សប្រជាជន នេះជាឱកាសល្អណាស់

លោកនាយករដ្ឋមន្រ្តី ហ៊ុន សែន នៅតែប្រកាសអំពាវនាវដល់សមាជិកនៃគណបក្សប្រឆាំងអោយចុះចូលជាមួយនឹងគណបក្សកាន់អំណាចដែលដឹកនាំដោយរូបលោក ខណៈអតីតអ្នកធ្វើការងារជាមួយ លោកហៅទង្វើនេះថា ជាផែនការរបស់ខ្មែរក្រហម ។ លោកនាយករដ្ឋមន្រ្តី ហ៊ុន សែន ថ្លែងបញ្ជាក់ថា សមាជិកនៃគណបក្សប្រឆាំងទាំងនោះ ពួកគេមាន ពេលត្រឹមតែ៨ថ្ងៃទៀតប៉ុណ្ណោះ ប្រសិនបើចង់ចុះចូលជាមួយនឹងគណបក្សកាន់អំណាច ដើម្បីរួម រស់នៅក្នុងជីវភាពនយោបាយ ។ លោកបានបញ្ជាក់ថា បើចង់ចុះចូលនោះ គឺត្រូវតែឆាប់ធ្វើអោយ ហើយ មុនពេលដែលគណបក្សសង្រ្គោះជាតិនឹងត្រូវបានរំលាយដោយតុលាការកំពូល ៖ « សូមបងប្អូនចាប់យកឱកាសនេះអោយបានមុនថ្ងៃប្រកាសសាលដីការដោយតុលាការកំពូលនៅថ្ងៃទី ១៦ ខែ វិច្ឆិកា ២០១៧ ខាងមុខនេះ » ។ ការថ្លែងអោយដឹងពីលោកនាយករដ្ឋមន្រ្តី ហ៊ុន សែន យ៉ាងដូច្នេះ ធ្វើឡើងនៅលើទំព័របណ្ដាញសង្គមហ្វេសប៊ុករបស់លោកដោយផ្ទាល់ កាលពីព្រឹកថ្ងៃទី៨ វិច្ឆិកា នេះ ខណៈពេលវេលាដែលលោក អះអាងថា នឹងត្រូវរំលាយគណបក្សសង្រ្គោះជាតិនោះ នៅសល់ត្រឹមត្រែ ៨ ថ្ងៃទៀតប៉ុណ្ណោះ ។ លោកនាយករដ្ឋមន្រ្តីជាង៣ទស្សវត្តន៍រូបនេះបានថ្លែងបញ្ជាក់ទៀតថា យោងតាមឯកសារភស្តុតាងទាំងអស់ និងតាមផ្លូវច្បាប់របស់ប្រទេស គឺគណបក្សសង្រ្គោះជាតិបានប្រឈមនឹងការរំលាយទាំងស្រុង ដែលនឹងប្រកាសដោយសាលដីការតុលាកំពូលនៅថ្ងៃទី ១៦ វិច្ឆិកា ២០១៧ ខាងមុខនេះ។ អតីតឧបនាយករដ្ឋមន្រ្តី និងជាអតីតរដ្ឋមន្រ្តីក្រសួងព័ត៌មាន លោក លឺ ឡាយស្រេង បានចោទប្រកាន់លោកនាយករដ្ឋមន្រ្តី ហ៊ុន សែន និងរដ្ឋាភិបាលរបស់លោកថា កំពុងតែធ្វើការងារអនុវត្តគោលនយោបាយរបស់ខ្មែរក្រហម ។ លោក លឺ ឡាយស្រេង បានថ្លែងបញ្ជាក់ថា ការប្រកាសរបស់លោកនាយករដ្ឋមន្រ្តី ហ៊ុន សែន អោយសមាជិករបស់គណបក្សប្រឆាំងទៅចុះចូលជាមួយនឹងគណបក្សប្រជាជន ដើម្បីពង្រឹងអំណាច ឬ ដើម្បីពង្រឹងគណបក្សខ្លួននេះ គឺជាគោលការណ៍ដែលខ្មែរក្រហមបានប្រើប្រាស់តែប៉ុណ្ណោះ ។ លោកចាត់ទុកថា នេះគឺជាការអនុវត្តគោលនយោបាយថ្មីរបស់ខ្មែរក្រហមច្បាស់ណាស់ ៖ « នឹងលោកតា ហ៊ុន សែន គាត់ធ្វើនឹងគឺដូចខ្មែរក្រហមកាលពីឆ្នាំ ៧០ ចឹងណាស់ ប្រកាសអោយបងប្អូនខ្មែរពី បរទេសទៅចុះចូល ទៅស្រុកខ្មែរវិញ ទៅសម្លាប់ចោលអស់។ អានឹងទៅចូលផែនការខ្មែរក្រហមលើកទីពីរហើយនេះ » ។ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា ស្ថានការណ៍នយោបាយសព្វថ្ងៃនេះ មើលទៅឃើញថា គណបក្សសង្គ្រោះជាតិកំពុងរងគ្រោះ ប៉ុន្តែលោកថា បញ្ហានេះក៏ជាឱកាស ធ្វើឲ្យគណបក្សនេះដឹងថា មានអ្នកណាខ្លះនៅស្ម័គ្រស្មោះ និងអ្នកណាខ្លះរត់ចោលបក្សនៅពេលបក្សជួបបញ្ហា។ មន្ត្រីសង្គមស៊ីវិលរូបនេះ បន្តថា អ្នកនយោបាយដែលចេញពីគណបក្សមួយទៅគណបក្សមួយដើម្បីរក្សាអំណាច ឬតំណែងរបស់ខ្លួន គឺអ្នកធ្វើទាំងនោះធ្វើនយោបាយដើម្បីតែអំណាចនឹងបុណ្យស័ក្ដិតែប៉ុណ្ណោះ មិនមែនដើម្បីប្រជាពលរដ្ឋនោះទេ។ ចំណែកឯប្រធានគណបក្សសង្រ្គោះជាតិលោក កឹម សុខា ដែលកំពុងជាប់ឃុំវិញនោះ ធ្លាប់បានចេញ លិខិតមួយប្រកាសអំពាវនាវដល់សមាជិករបស់ខ្លួនថា ត្រូវរក្សាឆន្ទៈពលរដ្ឋអោយបាន ។ លោកធ្លាប់លើកឡើងថា ប្រសិនបើអាចឆ្លងកាត់ដំណាក់កាលដ៏លំបាកនេះបាន គណបក្សសង្រ្គោះជាតិប្រាកដជានឹងអាចឆ្លងដល់គោលដៅ ។ យ៉ាងណាក៏ដោយចំពោះលោកនាយករដ្ឋមន្រ្តី ហ៊ុន សែន វិញនោះ បានថ្លែងបញ្ជាក់ប្រាប់ថា នេះជាឱកាសសម្រាប់សមាជិកបក្សប្រឆាំងដែលមានបំណងចូលរួមជាមួយបក្សប្រជាជនដើម្បីបម្រើប្រទេសជាតិ ៕