លោក សម រង្ស៊ី ៖ លោក ហ៊ុន សែន គឺជាឃាតករ និងជាជនក្បត់ជាតិយ៉ាងពិតប្រាកដ

អតីតប្រធានគណបក្សសង្រ្គោះជាតិ និងធ្លាប់ជាដៃគូរបដិបក្ខកំពូលជាមួយនឹងលោកនាយករដ្ឋមន្រ្តី ហ៊ុន សែន លោក សម រង្ស៊ី បានបន្តវាយប្រហារ និងចោទប្រកាន់លោកនាយករដ្ឋមន្រ្តី ហ៊ុន សែន ថា គឺជាជនក្បត់ជាតិ និងជាឃាតករសម្លាប់ពលរដ្ឋខ្មែរយ៉ាងពិតប្រាកដ ។ តាមរយៈសំណេរលើកឡើងរបស់លោក សម រង្ស៊ី ដែលធ្វើឡើងនៅព្រឹកថ្ងៃទី១៥ ខែតុលា ឆ្នាំ ២០១៧ នេះ លោក សម រង្ស៊ី បានបង្ហាញអំណះអំណាងចំនួន៣ចំណុចដែលបានបញ្ជាក់ថា លោក ហ៊ុន សែន គឺជាជនក្បត់ជាតិ ។ ទាំង៣ចំណុចនោះរួមមាន ៖ - ធ្វើឲ្យប្រទេសកម្ពុជា បាត់បង់ឯករាជ្យភាព និងអធិបតេយ្យភាពជាតិ ដោយក្លាយទៅជារណបប្រទេសវៀតណាម ក្រោយពីឆ្នាំ ១៩៧៩។ - ធ្វើឲ្យប្រទេសកម្ពុជា បាត់បង់ទឹកដីជាច្រើន ដោយសារតែគាត់បានចុះហត្ថលេខា លើសន្ធិសញ្ញាព្រំដែនដ៏អាក្រក់ ជាមួយប្រទេសវៀតណាម ក្នុងទសវត្សរ៍ឆ្នាំ ១៩៨០។ - ធ្វើឲ្យប្រទេសកម្ពុជា បាត់បង់ទ្រព្យសម្បត្តិជាតិជាច្រើន ដូចជាព្រៃឈើ និងទ្រព្យសម្បត្តិរដ្ឋមួយ ចំនួនធំ ក្រោមការដឹកនាំយ៉ាងពុករលួយរបស់គាត់ ក្នុងទសវត្សរ៍ឆ្នាំ ១៩៩០ ២០០០ និង ២០១០។ ក្រៅពីនេះ លោក សម រង្ស៊ី ដែលកំពុងនិរទេសខ្លួនរស់នៅឯក្រៅប្រទេស ក៏បានបង្ហាញអំណះអំណាងចំនួន២ផងដែរ ដើម្បីបញ្ជាក់ថា លោកនាយករដ្ឋមន្រ្តី ហ៊ុន សែន គឺជាឃាតករ ។ ទាំង២ចំណុចនេះ រួមមាន ៖ - ដឹកនាំការអនុវត្តន៍ ផែនការ ក៥ ដែលរៀបចំឡើងដោយប្រទេសវៀតណាម ហើយដែលបណ្តាលឲ្យប្រជាពលរដ្ឋរាប់ម៉ឺននាក់ ទទួលមរណភាព យ៉ាងអាណោចអធម ក្នុងទសវត្សរ៍ឆ្នាំ ១៩៨០។ - បញ្ជាឲ្យបក្ខពួកគាត់ សម្លាប់មនុស្សជាច្រើន ក្នុងព្រឹត្តិការណ៍ឆ្នាំ ១៩៩៧ (រដ្ឋប្រហារ និងការវាយប្រហារ ដោយគ្រាប់បែកដៃ នៅទីក្រុងភ្នំពេញ) និងឆ្នាំ ១៩៩៨ (ការបង្ក្រាបយ៉ាងសាហាវ មកលើបាតុកម្ម ដែលតវ៉ាពីការលួចបន្លំសន្លឹកឆ្នោត) ។ ប៉ុន្តែយ៉ាងណាក៏ដោយចុះ នេះមិនមែនជារឿងថ្មីឡើយសម្រាប់អតីតប្រធានគណបក្សសង្រ្គោះជាតិរូបនេះ ។ កន្លងមក និងបច្ចុប្បន្ននេះលោក សម រង្ស៊ី នៅតែបន្តធ្វើការរិះគន់ វាយប្រហារ និងជីកឆ្កឹះឆ្គៀល ជាហូរហែរពីរឿងរ៉ាវនៃរដ្ឋាភិបាលគណបក្សប្រជាជនកម្ពុជា ៕