រដ្ឋមន្រ្តីការពារជាតិប្រកាសជាថ្មីអោយកងកម្លាំងត្រៀមខ្លួន

រដ្ឋមន្រ្តីក្រសួងការពារជាតិ លោក ទា បាញ់ បានប្រកាសជាថ្មីម្ដងទៀតប្រាប់ទៅកងទ័ពថា ត្រូវតែត្រៀមខ្លួនធ្វើការទប់ទល់ជាមួយនឹងស្ថានការណ៍ និងរាំងខ្ទប់ចំពោះជនណាដែលមានបំណងចង់អោយមានបដិវត្តន៍ពណ៌នៅកម្ពុជា ។ លោក ទា បាញ់ បានថ្លែងបញ្ជាក់ថា មិនអាចអោយកើតមានជាដាច់ខាតចំពោះបដិវត្តន៍ពណ៌នៅកម្ពុជានេះ ក្រោមហេតុផលថា វាធ្វើអោយប៉ះពាល់ដល់តម្លៃសន្តិភាពដែលរដ្ឋាភិបាលរបស់លោកបានកសាងអស់រយៈពេលជាច្រើនឆ្នាំកន្លងមកនេះ ។ លោកបានបញ្ជាក់ប្រាប់ទៅកងកម្លាំងថា ទោះតម្លៃណាក៏ដោយត្រូវតែកម្ចាត់ចេញជាដាច់ខាត ៖ « ដាច់ខាតទោះជាតម្លៃណាក៏ដោយ ក៏មិនឲ្យកើតមានបដិវត្តពណ៌នៅប្រទេសកម្ពុជានោះឡើយ » ។ លោក ទា បាញ់ ថ្លែងអោយដឹងបែបនេះ ធ្វើឡើងនៅក្នុងពិធីរលឹកខួបអនុស្សាវរីយ៍លើកទី២២ ថ្ងៃបង្កើតកងពលតូចទ័ពពិសេសឆ័ត្រយោង៩១១ និងពិធីសម្ពោធដាក់ឲ្យប្រើប្រាស់ជាផ្លូវការអគារបណ្ណាល័យ សាលតាំង សាលប្រជុំ កាលពីព្រឹកថ្ងៃទី១ ខែវិច្ឆិកា ឆ្នាំ ២០១៧ នេះ ។ នេះបើយោងតាម សារព័ត៌មានហ្វ្រែសញ៉ូ ដែលបានដកស្រង់សម្ដីយកមកចុះផ្សាយនៅរសៀលនេះ ។ ថ្លែងនៅក្នុងពិធីដដែលនេះ លោក ទា បាញ់ បានបញ្ជាក់ប្រាប់កងកម្លាំងទ័ពទៀតថា កម្ពុជាក៏មិនត្រូវ ការ ការជ្រៀតជ្រែកពីបរទេសមកលើកិច្ចការងាររបស់កម្ពុជាដែរ ។ លើសពីនេះទៀត រដ្ឋមន្រ្តីការពារ ជាតិរូបនេះថែមទាំងនិយាយផ្លែផ្កាដល់អ្នកដែលបានថ្លែងសារនយោបាយលើកឡើងថា នៅកម្ពុជាមិនមានការគោរពសិទ្ធិមនុស្ស និងធ្វើការងារប៉ះពាល់ដល់ប្រជាធិបតេយ្យ ។ ក្រៅពីនេះទៀត លោក ទា បាញ់ បានចោទប្រកាន់គណបក្សសង្រ្គោះជាតិថា ជាគណបក្សដែលដឹកនាំដោយជនក្បត់ជាតិ និងថាថ្នាក់ដឹកនាំនៃគណបក្សសង្រ្គោះជាតិសុទ្ធតែជាក្រុមបោកប្រាស់តែ ប៉ុណ្ណោះ ។ លោក ទា បាញ់ថែមទាំងបានផ្ដាំទៅកាន់កងម្លាំងថា អោយពន្យល់ពលរដ្ឋអោយយល់ ដឹងពីឧបាយកលរបស់គណបក្សសង្រ្គោះជាតិទៀតផង ៕ អត្ថបទព័ត៌មានមួយនេះ យើងខ្ញុំបាន ចម្លងចេញទាំងស្រុងពីវេបសាយរបស់វិទ្យុសម្លេងព្រះសង្ឃឯករាជ្យ ដែលផ្សាយចេញនៅរសៀលថ្ងៃនេះ ៕