ល្មមដល់ពេលអ្នកនយោបាយ ឈប់ធ្វើនយោបាយជាន់ឈ្លីគ្នា ឬហែកហួរគ្នាហើយ គួរធ្វើដើម្បីផលប្រយោជន៍ជាតិជាធំ

Source from VIM Radio ។ អត្ថបទដោយ ច័ន្ទ រង្សី ។ ប្រជាជនកម្ពុជានឹងត្រូវទទួលរងនូវភាពអាម៉ាស់យ៉ាងខ្លាំងនៅលើឆាកអន្តរជាតិ ប្រសិនបើ អ្នកនយោបាយ និងពលរដ្ឋក្នុងប្រទេសមួយនេះមិនរួបរួមគ្នាកសាងប្រទេស ហើយនៅតែបន្តច្រណែនឈ្នានីសគ្នា ដោយសម្ដែងពីភាពមិនទុកចិត្តគ្នា ធ្វើការបរិហារគ្នាទៅវិញទៅមកថា បុគ្គលនេះមនុស្សរបស់គណបក្សនេះ ឬគណបក្សនោះជាដើម ។ ប្រវត្តិសាស្រ្តបង្ហាញមកថា ប្រទេសកម្ពុជាបានធ្លាក់ខ្លួនពីប្រទេសដែលមានកិត្យានុភាពល្បីល្បាញក្នុងសកលលោក ទៅជាប្រទេសមួយ ដោយពីមួយជំនន់ទៅមួយជំនន់ជួបតែភ្លើងសង្រ្គាម កាប់សម្លាប់គ្នា រវាងឪពុក និងកូន ពូ និង ក្មួយ និងបងប្អូនខ្លួនឯងក៏មាន ។ ការនិយមប្រកាន់បក្សពួករបស់អ្នកនយោបាយ និងប្រជាពលរដ្ឋសាមញ្ញនេះ បានបន្សល់ទុកនូវគំរូមិនល្អដល់ពលរដ្ឋនិងយុវជនជំនន់ក្រោយ ហើយភាពសង្ស័យ និងការវាយប្រហារគ្នាដោយមិនប្រើយោនិសោមនសិការ នៅតែបន្តកើតមានជាបន្តបន្ទាប់នៅក្នុងសង្គមខ្មែរសព្វថ្ងៃនេះ ។ នៅពេលប្រទេសជាតិជួបវិបត្តិគួរណាស់តែ ពលរដ្ឋពីគ្រប់មជ្ឈដ្ឋានរួបរួមគ្នាជាកម្លាំងមួយដ៏រឹងមាំក្នុងបំណងដើម្បីកសាងប្រទេសជាតិរបស់ខ្លួន ដោយស្មារតីយកចិត្តទុកដាក់ខ្ពស់ និងប្រកបដោយសេចក្ដីអំណត់ជាទីបំផុត ។ ផ្ទុយទៅវិញ ពលរដ្ឋកម្ពុជាមួយចំនួនបែរជាឈ្លោះគ្នាមិនចេះចប់មិនចេះហើយ ។ យើងសូមលើកគំនិតយោបល់ខ្លះៗមកធ្វើការពិរណាទាំងអស់គ្នាមើលថា នៅពេលយើងបន្តឈ្លោះទាស់ទែងគ្នា តើនរណាជាអ្នកខាតបង់ និងនរណាជាអ្នកទទួលបានផលចំណេញពីការឈ្លោះទាស់ទែងគ្នានេះ ។ ជាក់ច្បាស់ហើយ អ្នកដែលខាតបង់គឺប្រទេសកម្ពុជាទាំងមូលជាអ្នកខាតបង់ ប្រជាពលរដ្ឋខ្មែរទូទាំងនរគជាអ្នកខាតបង់ ។ ពីព្រោះពលរដ្ឋខ្មែរយើង បាត់បង់ឪកាសក្នុងការប្រកបកិច្ចការងារចិញ្ចឹមជីវិត បាត់បង់ឱកាសក្នុងការកសាងជាតិ មិនបានផ្ដល់គំរូល្អដល់កូនចៅជំនន់ ក្រោយ ។ ជាងនេះទៀត ប្រទេសជាតិមានការខ្ទិចខ្ទាំបន្តិចម្ដងៗ ដោយសារតែស្នាដៃរបស់យើងខ្លួនឯង មិនចាំបាច់មានប្រទេសណាគេមកបំផ្លាញប្រទេសយើងផង ។ តែប្រសិនបើមានភាគីប្រទេសដទៃមកឈ្លានពានផងនោះ វាគឺជាឱកាសមាសសម្រាប់ពួកគេក្នុងការលេបត្របាក់ទឹកដីរបស់យើងជាកជាមិនខាន ។ មិនថាជាក់ស្ដែងនិយម ឬក៏ទ្រឹស្ដីនិយមទេបើកាលណាផ្ទៃក្នុងកម្ពុជាបានបែកបាក់ហើយនោះ អ្នកដែលទទួលបានផលប្រយោជន៍ជាតិយើង គឺប្រទេសដទៃដែលនៅជុំវិញយើងតែម្ដង ។ ទ្រឹស្ដីខាងលើនេះយើងអាចហៅថា ល្បិចខ្ចីកាំបិតសម្លាប់មនុស្ស ឬ ខ្ចីដៃមនុស្សប្រើក៏បាន ។ ការលើកយកទ្រឹស្ដីមកធ្វើអត្ថាធិប្បាយនៅក្នុងទីនេះ មិនមែនជាការបង្រៀនដល់លោកអ្នកនយោបាយ និងប្រជាពលរដ្ឋខ្មែរនោះទេ ដោយយើងជឿថា លោកអ្នកពិតជាចេះដឹង និងចេះចាំគ្រប់ៗគ្នា ។ ការរំលឹកនៅក្នុងពេលនេះ គ្រាន់តែជាការអំពាវនាវសំណូមពរឲ្យម្ចាស់ទឹកដីកម្ពុជរដ្ឋទាំងអស់មេត្តាតម្កល់ផលប្រយោជន៍ជាតិជាធំ ហើយរួមគ្នាកសាងជាតិរបស់យើងឲ្យរីកចម្រើន ។ ប្រសិនបើយើងនៅតែបន្តឈ្លោះហែកហួរគ្នា ហើយយកធ្យូងលាបដាក់មុខគ្នាទៅវិញទៅមកបែនេះ នោះអ្នកនយោបាយ និងប្រជាពលរដ្ឋកម្ពុជានឹងទទួលរងភាពអាម៉ាស់ជាប់ជាប្រវត្តិសាស្រ្តថា ជាអ្នកនយោបាយ និងពលរដ្ឋដែលមានភាពខ្ជះខ្ជាយ គិតតែផលប្រយោជន៍ផ្ទាល់ខ្លួន ជាមនុស្សអាត្មានិយម បើទោះបីជាប្រទេសលិចលង់យ៉ាងណាក៏មិនខ្វល់ ហើយជាប់ឈ្មោះជាជាតិសាស្រ្តដែលបំផ្លាញជាតិឯង បំផ្លាញនូវទឹកដីដើមកំណើតរបស់ខ្លួន ។ តែផ្ទុយទៅវិញ កម្ពុជាអាចនឹងមានការរីចម្រើនរុងរឿង ប្រសិនបើអ្នកនយោបាយ និងប្រជាពលរដ្ឋខ្មែរពួតដៃគ្នាដោយទឹកមុខរីករាយ និងប្រកបដោយស្មារតីទទួលខុសត្រូវខ្ពស់ក្នុងការកសាងសង្គមជាតិមួយនេះ ៕