អាមេរិកប្រាប់ពលរដ្ឋខ្លួនដែលរស់នៅកម្ពុជាថា ត្រូវប្រុងប្រយ័ត្នអោយបានខ្ពស់

សហរដ្ឋអាមេរិកតាមរយៈស្ថានទូតដែលមានប្រចាំការនៅទីក្រុងភ្នំពេញបានប្រកាសអំពាវនាវដល់ប្រជាពលរដ្ឋរបស់ខ្លួនដែលមានរស់នៅកម្ពុជាថា ត្រូវតែមានការប្រុងប្រយ័ត្នអោយបានខ្ពស់ ។ នៅក្នុងសេចក្ដីថ្លែងការណ៍របស់ស្ថានទូតអាមេរិកជាភាសារអង់គ្លេស ដែលធ្វើឡើងនៅលើហ្វេសប៊ុក នៅព្រឹកថ្ងៃទី១៦ ខែវិច្ឆិកា នេះ ពួកគេបានលើកឡើងថា នៅថ្ងៃនេះ គឺជាថ្ងៃដែលតុលាការសាលាកំពូលបើកសវនាការសាធារណៈលើបណ្ដឹងប្ដឹងដោយក្រសួងមហាផ្ទៃដែលស្នើអោយរំលាយគណបក្សសង្រ្គោះជាតិ ។ ដូច្នេះពួកគេបានអំពាវនាវទៅដល់ពលរដ្ឋអាមេរិកថា ត្រូវជៀសអោយឆ្ងាយពីហ្វូងមនុស្សដែលមានការប្រមូលផ្ដុំភ្លាមៗ និងមិនត្រូវទៅក្បែឡើយ ។ តាមរយៈសេចក្ដីថ្លែងការណ៍ដែលធ្វើឡើងជាភាសារអង់គ្លេសដដែលនេះបានបញ្ជាក់ថា ការអំពាវនាវ អោយពលរដ្ឋអាមេរិកជៀសអោយឆ្ងាយពីបញ្ហាទាំងនេះ ដោយសារតែអាជ្ញាធរនៅរាជធានីភ្នំពេញកំពុងតែរឹងបន្តឹងសន្តិសុខ ដោយការដាក់ពង្រាយកងកម្លាំងស្ទើរគ្រប់តំបន់សំខាន់ៗ ខ្លាចក្រែងមានការតវ៉ាណាមួយពីសកម្មជនរបស់គណបក្សប្រឆាំងជុំវិញបណ្ដឹងរំលាយគណបក្សនេះ ៕