លោក ជួន សុវណ្ណ អះអាងថា មិនបានបំភ័យពលរដ្ឋទេ គ្រាន់តែដាក់កងកម្លាំងការពារសវនាការតុលាការ

ស្នងការនគរបាលរាជធានីភ្នំពេញ លោក ជួន សុវណ្ណ បានថ្លែងអះអាងថា ការដាក់ពង្រាយកងកម្លាំងនៅតំបន់សំខាន់ៗមួយចំនួនក្នុងរាជធានីភ្នំពេញនាព្រឹកនេះ គឺពុំមែនមានចេតនាបំភិតបំភ័យដល់ប្រជាពលរដ្ឋខ្មែរនោះទេ ។ នៅក្នុងជំនួបជាមួយនឹងអ្នកសារព័ត៌មានមកពីច្រើនស្ថាប័ននៅមុខតុលាការសាលាកំពូលនាព្រឹកថ្ងៃទី១៦ ខែវិច្ឆិកា ឆ្នាំ ២០១៧ នេះ លោក ជួន សុវណ្ណ បានថ្លែងអះអាងថា រឿងសំខាន់ដែលពួកលោកត្រូវការយ៉ាងចាំបាច់នាពេលនេះ គឺការពារសុវត្ថិភាព និងដើម្បីរក្សាសណ្ដាប់ធ្នាប់សាធារណៈចំពោះការ បើកសវនាការសាធារណៈដោយតុលាការសាលាកំពូលចំពោះបណ្ដឹងប្ដឹងដោយក្រសួងមហាផ្ទៃ ដែលស្នើអោយមានការរំលាយគណបក្សសង្រ្គោះជាតិ ។ លោក ជួន សុវណ្ណ ថ្លែងបែបនេះ ៖ « ការពារសន្តិសុខ និងសុត្ថិភាពជូនអង្គសវនាការ បាទ ចឹងទេក្នុងកិច្ចការងារនេះ គឺនេះបាន គឺតុលាការកំពូលបានប្រកាសហើយ គឺជាសវនាការសាធារណៈ » ។ សូមជម្រាបថា អាជ្ញាធរចម្រុះរាប់ពាន់នៅព្រឹកនេះ បានដាក់ពង្រាយកំលាំងជុំវិញតុលាការកំពូល និងតាមផ្លូវពីបណ្ដាខេត្ត ឆែកឆេរយ៉ាងតឹងរឹង ក្នុងថ្ងៃបើកសវនាការសំណុំរឿង បណ្តឹងរបស់ក្រសួងមហាផ្ទៃរំលាយគណៈបក្សសង្គ្រោះជាតិ។ បើតាមអ្នកធ្វើដំណើរខ្លះបានអះអាងថា អាជ្ញាធរក៏បានធ្វើការឆែកតាមរថយន្តក្រុង រថយន្តបើកបរផ្សេងៗដោយអ្នកធ្វើដំណើរតាមដងផ្លូវ ។ ប្រភពមួយចំនួនអះអាងថា ការឆែកឆេរនេះ ទំនងដោយសារខ្លាចមានសកម្មជនរបស់គណបក្សប្រឆាំង ដែលចង់ទៅប្រមូលផ្ដុំគ្នានៅមុខតុលាការសាលាកំពូល ខណៈដែលតុលាការជាន់ខ្ពស់មួយនេះ កំពុងបើកសវនាការតាមបណ្ដឹងរបស់ក្រសួងមហាផ្ទៃ ៕