រំលាយបក្សសង្រ្គោះជាតិបានសម្រេច លោក ហ៊ុន សែន នៅតែព្យាយាមអូសទាញសមាជិកបក្សប្រឆាំងអោយចុះចូលជាមួយខ្លួន

លោកនាយករដ្ឋមន្រ្តី ហ៊ុន សែន នៅតែប្រកាសអំពាវនាវទៅដល់សមាជិកនៃគណបក្សសង្រ្គោះជាតិ នៅថ្នាក់មូលដ្ឋានទាំងអស់ អោយចុះចូលជាមួយនឹងគណបក្សប្រជាជនរបស់លោក ។ លោកនាយករដ្ឋមន្រ្តី ហ៊ុន សែន នៅតែអះអាងថា លោកនៅតែទទួលស្វាគមន៍សមាជិករបស់គណ បក្សសង្រ្គោះជាតិទាំងនោះ ប្រសិនណាបើពួកគេពិតជាមានឆន្ទៈចង់ចុះចូលជាមួយនឹងគណបក្សប្រ ជាជនរបស់លោកមែននោះ ។ លោកបានបញ្ជាក់ថា ចំពោះអ្នកដែលមានគំនិតចង់ចុះចូល គួរណាតែ ធ្វើអោយហើយ ព្រោះថា ពេលវេលានៃការបើកឱកាសអោយចុះចូលនេះ គឺនៅមិនយូរទៀតឡើយ ។ លោ ហ៊ុន សែន បញ្ជាក់បែបនេះ ៖ « ខ្ញុំនៅតែបន្តអំពាវនាវចំពោះបងប្អូន ដែលជាសមាជិកក្រុមប្រឹក្សាឃុំសង្កាត់ សមាជិកក្រុមប្រឹក្សា ខេត្ត ស្រុកខ័ណ្ឌ នៅទូទាំងប្រទេស បងប្អូននៅមានពេលនៅឡើយ ។ បន្ទាប់ពីគណបក្សសង្រ្គោះ ជាតិត្រូវរំលាយ រយៈពេលពីរអាទិត្យយ៉ាងយូរនឹងត្រូវរៀបចំបែងចែកអាសនៈនោះអោយរួចរាល់ ដូច្នេះបងប្អូននៅមានលទ្ធភាពមួយអាទិត្យ ឬក៏ច្រើនជាងមួយអាទិត្យបន្តិចមុនពេលដែលគណបក្ស នយោបាយនានានឹងដាក់បញ្ជីឈ្មោះទៅកាន់គណៈកម្មាធិការជាតិរៀបចំការបោះឆ្នោត » ។ ការថ្លែងអំពាវនាវរបស់លោកនាយករដ្ឋមន្រ្តី ហ៊ុន សែន យ៉ាងដូច្នេះ ធ្វើឡើងតាមរយៈសេចក្ដីថ្លែងការណ៍ដោយផ្ទាល់ ដែលត្រូវបានផ្សព្វផ្សាយចេញពីស្ថានីយ៍ទូរទស្សនរបស់រដ្ឋ និងឯកជន កាលពីយប់ថ្ងៃទី១៦ ខែវិច្ឆិកា យប់មិញនេះ ក្រោយពេលដែលមេធាវីរបស់ក្រសួងមហាផ្ទៃបានបញ្ជាក់ពីការ ប្រកាសសាលដីការរំលាយគណបក្សសង្រ្គោះជាតិ ។ តុលាការជាន់ខ្ពស់កាលពីថ្ងៃទី១៦ វិច្ឆិកា បានសម្រេចចេញសាលដីការប្រកាសរំលាយគណបក្សសង្រ្គោះជាតិជាស្ថាពរនិងបានបិទសិទ្ធិតំណាងរាស្រ្តមកពីគណបក្សសង្រ្គោះជាតិចំនួន១១៨រូប ដែលសុទ្ធសឹងតែជាសមាជិកគណៈកម្មាធិការនាយកនៃគណបក្សនេះ លែងអោយធ្វើនយោបាយចំនួន៥ឆ្នាំ ។ លោកនាយករដ្ឋមន្រ្តី ហ៊ុន សែន បានអះអាងថា នេះគឺជារឿងដែលត្រឹមត្រូវបំផុតសម្រាប់ការសម្រេចរបស់សាលាកំពូល ។ លើសពីនេះទៀតលោកនាយករដ្ឋមន្រ្តី ហ៊ុន សែន ក៏នៅតែប្រកាសអំពាវនាវដល់សមាជិកបក្សប្រឆាំងតាមមូលដ្ឋានអោយចុះចូលនឹងបក្សកាន់អំណាច បើសិនជាចង់បន្តតំណែងជាធម្មតា ឬក៏អាចបង្កើតគណបក្សផ្សេងបាន ។ លោក ហ៊ុន សែន បញ្ជាក់បែបនេះ ៖ « រាជរដ្ឋាភិបាលសុំប្រកាសគាំទ្រចំពោះសាលដីការរបស់តុលាការកំពូលនេះ ហើយការសម្រេចនេះ គឺនឹងធានាបាននៅការបន្តរក្សា ការពារបានគង់វង្សនូវសន្តិភាព ស្ថេរភាព ឯករាជ្យ អធិបតីភាពនិងដើម្បីបន្តអភិវឌ្ឍសេដ្ឋកិច្ចសង្គមប្រកបដោយចីរភាព » ។ ក្រៅពីការប្រកាសគាំទ្រ និងការអំពាវនាវរបស់លោកអោយសមាជិកបក្សប្រឆាំងចុះចូល ក្រោយគណបក្សសង្រ្គោះជាតិត្រូវបានរំលាយនោះ លោកនាយករដ្ឋមន្រ្តី ហ៊ុន សែន ក៏បានប្រកាសបើកផ្លូវ អោយសមាជិកនៃគណបក្សសង្រ្គោះជាតិនៅតាមមូលដ្ឋានទាំងនោះបើកគណបក្សនយោបាយថ្មី ឬក៏អាចទៅចុះចូលជាមួយនឹងគណបក្សនយោបាយណាផ្សេងទៀតក៏បាន ៕