ព្រះអង្គ ប៊ុត ប៊ុនតិញ ចាត់ទុកការស្នើលុយពីលោក ហ៊ុន សែន មកធ្វើចេតិយបណ្ឌិត កែម ឡី ថា ជាការរួមដៃគ្នាសម្លាប់កិត្តិយសបណ្ឌិត កែម ឡី

ស្ថាបនិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះអង្គ ប៊ុត ប៊ុនតិញ បានមានព្រះថេរដីការរិះគន់ និងហាក់មិនពេញចិត្តជាមួយនឹងអ្វីដែលក្រុមគ្រួសារលោកបណ្ឌិត កែម ឡី កំពុងធ្វើ ។ តាមរយៈសារនៅលើហ្វេសប៊ុករបស់ព្រះអង្គ ប៊ុត ប៊ុនតិញ ដែលបានបង្ហោះទាំងប្រយោលហាក់មិនចំ ឈ្មោះទៅលើបុគ្គលណាម្នាក់ ប៉ុន្តែអមជាមួយនឹងលិខិតដែលក្រុមគ្រួសារបណ្ឌិត កែម ឡី បានស្នើសុំថវិកាពីលោកនាយករដ្ឋមន្រ្តី ហ៊ុន សែន នោះ ព្រះអង្គហាក់មិនពេញចិត្តសោះឡើយ និងថែមទាំង បានរិះគន់ថា នេះគឺជាការរួមដៃគ្នាដើម្បីនឹងសម្លាប់កិត្តិយសរបស់បណ្ឌិត កែម ឡី ថែមទៀតផង ។ ព្រះអង្គ ប៊ុត ប៊ុនតិញ អោយដឹងបែបនេះ ៖ « យើងបានដឹងគុណលោកបណ្ឌិតតាមរយៈធ្វើបុណ្យជូនយ៉ាងសមរម្យ។ តែពេលនេះមានអ្នកតាមសម្លាប់កិត្តិយសលោកទៀត។ តើអ្នកនរណាជា អ្នកសម្លាប់ នឹងរួមដៃសម្លាប់កិត្តិយសលោកបណ្ឌិត? » ។ កាលពីប៉ុន្មានថ្ងៃមុននេះ លោកនាយករដ្ឋមន្រ្តី ហ៊ុន សែន បានផ្ដល់ថវិកាប្រមាណ២ម៉ឺនដុល្លារបន្ថែម ទៀតដល់ក្រុមគ្រួសាររបស់លោកបណ្ឌិត កែម ឡី ដើម្បីតបតាមការស្នើសុំ ។ ក្នុងលិខិតដែលក្រុមគ្រួសាររបស់លោកបណ្ឌិត កែម ឡី ស្នើសុំនោះ បានស្នើសុំ ថវិកាបំពេញបន្ថែមដើម្បីអោយជួយសាងសង់ចេតិយនេះ ។ លិខិតនេះបានបញ្ជាក់ថា ថវិកាដែល លោកនាយករដ្ឋមន្រ្តី ហ៊ុន សែន ផ្ដល់ចំនួន៥ ម៉ឺនដុល្លារកាលពីគ្រាមុននោះ បានយកទៅចំណាយលើការសាងសង់ចេតិយជាបឋម អស់ទៅហើយ ។ តបតាមការលើកឡើងទាំងនេះ ព្រះអង្គ ប៊ុត ប៊ុនតិញ ចាត់ទុកថា នេះ គឺជាការរួមដៃសម្លាប់កិត្តិយស លោកបណ្ឌិត កែម ឡី ។ ព្រះអង្គ ប៊ុត ប៊ុនតិញ អោយដឹងបែបនេះ ៖ « យើងបានរួមគ្នាការពារតម្លៃវីរជនក្នុងបេះដូងខ្មែរគ្រប់ ឧបសគ្គ តែអ្វីដែលបានខំប្រឹងត្រូវបានគេបំផ្លាញចោលស្ទើរតែទាំងស្រុង។ លោកបណ្ឌិតជាទីគោរពនៃយើងត្រូវបានឃាតករសម្លាប់ ហើយយើងបានដឹងគុណលោកបណ្ឌិត តាមរយៈធ្វើបុណ្យជូនយ៉ាងសមរម្យ។ តែពេលនេះមានអ្នកតាមសម្លាប់កិត្តិយសលោកទៀត។ តើអ្នកនរណាជាអ្នកសម្លាប់ នឹងរួមដៃសម្លាប់កិត្តិយសលោកបណ្ឌិត? » ៕