លោក ហ៊ុន សែន ចេញវីដេអូដោយផ្ទាល់បញ្ជាក់ថា ត្រូវតែរំលាយគណបក្សសង្រ្គោះជាតិ

លោកនាយករដ្ឋមន្រ្តី ហ៊ុន សែន បានថ្លែងជាថ្មីម្ដងទៀតប្រាប់ទៅសមាជិករបស់គណបក្សប្រឆាំងថា គណបក្សសង្រ្គោះជាតិប្រាកដជាអាចនឹងត្រូវបានរំលាយនៅក្នុងរយៈពេលដ៏ខ្លីខាងមុខនេះ ខណៈអន្តរជាតិជុំវិញកម្ពុជាព្រមានពីហានិភ័យដែលអាចនឹងកើតឡើងសម្រាប់កម្ពុជា បើការរំលាយបក្ស ប្រឆាំងនេះពិតជាអាចកើតឡើងមែន ។ អមជាមួយនឹងការថ្លែងប្រាប់ទៅសមាជិកគណបក្សប្រឆាំងយ៉ាងដូច្នេះ លោកនាយករដ្ឋមន្រ្តី ហ៊ុន សែន បានឆ្លៀតផ្ដាំទៅសមាជិករបស់គណបក្សប្រឆាំងថា គួរណាមកចុះចូលជាមួយនឹងគណបក្សប្រជាជន ដើម្បីអាចរក្សាតំណែងអោយនៅដដែលជាធម្មតា និងដើម្បីអាចបានបន្តបម្រើប្រជាពលរដ្ឋ របស់ពួកគេជាធម្មតានៅតាមបណ្ដាតំបន់ដែលពួកគេធ្វើការ ៖ « ប៉ុន្តែបងប្អូនត្រូវយល់ថា ប្រសិនបើ គណបក្សសង្រ្គោះជាតិមិនត្រូវបានរំលាយទេនោះ តើខ្ញុំមានការចាំបាច់អីដើម្បីនឹងទៅយកបងប្អូន ទៅយកមកធ្វើអ្វី? ព្រោះនេះជាកិច្ចការទាក់ទងទៅនឹងអនាគតបងប្អូនក្នុងការបម្រើប្រជាពលរដ្ឋ» ។ ការថ្លែងលើកឡើងរបស់លោកនាយករដ្ឋមន្រ្តី ហ៊ុន សែន យ៉ាងដូច្នេះ ធ្វើឡើងតាមរយៈការផ្សាយបន្តផ្ទាល់ចេញពីទំព័របណ្ដាញសង្គមហ្វេសប៊ុកដោយផ្ទាល់របស់លោក ដែលផ្សាយចេញនៅព្រឹកថ្ងៃទី៤ ខែវិច្ឆិកា ឆ្នាំ ២០១៧ នេះ ។ តាមរយៈវីដេអូផ្សាយចេញពីហ្វេសប៊ុកដដែលនេះ លោកនាយករដ្ឋមន្រ្តី ហ៊ុន សែន បានចោទប្រកាន់ទៅលើថ្នាក់ដឹកនាំគណបក្សសង្រ្គោះជាតិលោក កឹម សុខា និងលោក សម រង្ស៊ី អតីតប្រធាន គណបក្សសង្រ្គោះជាតិថា ជាជនក្បត់ជាតិយ៉ាងពេញៗមាត់តែម្ដង ។ លើសពីនេះទៀត លោកថែមទាំងបាន ប្រាប់ទៅសមាជិកគណបក្សប្រឆាំងតាមរយៈការផ្សាយបន្តផ្ទាល់នេះថា លោក កឹម សុខា និងលោក សម រង្ស៊ី ជាមេដឹកនាំដែលប្រព្រឹត្តទង្វើអាក្រក់ជូរជាតិយ៉ាងខ្លាំង ដែលអ្នកគាំទ្ររបស់ពួកគេមិនបានឃើញ និងមិនបានដឹងកន្លងមក ។ លោកនាយករដ្ឋមន្រ្តីក៏សង្ឃឹមទៀតថា តាមរយៈការអំពាវនាវរបស់លោកជាថ្មីម្ដងនេះ អ្នកគាំទ្រ និង សមាជិករបស់គណបក្សប្រឆាំងនឹងចុះចូលជាមួយគណបក្សប្រជាជន ដើម្បីបម្រើប្រជាពលរដ្ឋបន្ត បើពុំដូច្នោះទេ ពួកគេនឹងបាត់បង់ការងារ និងមុខតំណែងជាក់ជាមិនខានឡើយ នៅពេលនណាដែល គណបក្សសង្រ្គោះជាតិត្រូវបានគេរំលាយមែន ។ ប៉ុន្តែយ៉ាងណាក៏ដោយ សហគមន៍អន្តរជាតិជាច្រើននៅជុំវិញកម្ពុជា ជាពិសេសអ្នកពាក់ព័ន្ធនឹងកម្ពុជាមានប្រទេសនៅលោកខាងលិចនោះ បានរិះគន់ចំពោះចំណាត់ការបែបនេះ ។ ពួកគេខ្លះបានព្រមានដកទូត អ្នកខ្លះព្រមានដាក់មន្រ្តីរដ្ឋាភិបាលក្នុងបញ្ជីខ្មៅ និងប្រទេសខ្លះទៀតព្រមានបិទការលើ កលែងពន្ធចំពោះការនាំចូលជាដើម ៕