កុំខ្លាំង !! កម្ពុជាខកចិត្ត ដែលអាមេរិកបន្តដាក់បម្រាមទិដ្ឋាការចំពោះមន្រ្តីរដ្ឋាភិបាលកម្ពុជា

រដ្ឋាភិបាលរបស់កម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិបានបង្ហាញពីការខកចិត្តជាមួយនឹងរដ្ឋាភិបាលនៃសហរដ្ឋអាមេរិក ដែលបានបន្តធ្វើការដាក់បម្រាមទិដ្ឋាការចំពោះមន្រ្តី រដ្ឋាភិបាលកម្ពុជា និងក្រុមគ្រួសាររបស់ពួកគេ ។ នៅក្នុងសេចក្ដីប្រកាសព័ត៌មានរបស់ក្រសួងការបរទេសដែលជាការដកស្រង់សម្ដីរបស់លោក ប្រាក់ សុខុន រដ្ឋមន្រ្តីក្រសួងការបរទេសរបស់កម្ពុជាមកបង្ហាញបានលើកឡើងពីសម្ដីរបស់រដ្ឋមន្រ្តីរូបនេះចំ ពោះការណ៍ដែលបានបង្ហាញការខកចិត្តយ៉ាងខ្លាំងទៅលើការរិតត្បិតផ្នែកទិដ្ឋាការ ទោះបីជាការពិតកម្ពុជាបានជូនដំណឹងជាផ្លូវការរួចទៅហើយ ទៅសហរដ្ឋអាមេរិកអំពីការសម្រេចចិត្តរបស់ខ្លួន ក្នុងការបន្តទទួលយកពលរដ្ឋខ្មែរ ដែលត្រូវបណ្តេញចេញ‍។ សម្ដីរបស់លោក ប្រាក់ សុខុន ដែលបានលើកឡើងទាំងនេះ គឺជាការធ្វើឡើងនៅក្នុងជំនួបមួយរវាងលោកប្រាក់សុខុន រដ្ឋមន្ត្រីការបរទេសកម្ពុជាជាមួយនឹងលោក Matthew Pottinger ដែលជាជំនួយការរងប្រធានាធិបតីសហរដ្ឋអាមេរិក លោក ដូណាល់ត្រាំ និងលោក Patrick Murphy ឧបការីរងរដ្ឋមន្ត្រីការបរទេសសហរដ្ឋអាមេរិកទទួលបន្ទុកកិច្ចការអាស៊ីអាគ្នេយ៍នៅទីក្រុងម៉ានីល ប្រទេសហ្វីលីពីនកាលពីថ្ងៃអង្គារ។ កាលពីកន្លងទៅ រដ្ឋាភិបាលរបស់សហរដ្ឋអាមេរិកបានប្រកាសលែងចេញទិដ្ឋាការប្រភេទមិនមែនអន្តោប្រវេសន៍ ឲ្យមន្រ្តីជាន់ខ្ពស់នៃក្រសួងការបរទេសកម្ពុជា និងក្រុមគ្រួសាររបស់ពួកគេចាប់ពីថ្ងៃទី១៣ ខែកញ្ញា ដើម្បីជាផ្នែកមួយនៃទណ្ឌកម្ម ដែលឆ្លើយតបនឹងក្រុមប្រទេស ដែលមានការយឺតយ៉ាវ ឬមិនព្រមទទួលជនជាតិរបស់ខ្លួនពីសហរដ្ឋអាមេរិកវិញ ក្រោយពីពួកគេបានប្រព្រឹត្តកំហុស ។ ប៉ុន្តែរដ្ឋាភិបាលកម្ពុជាវិញ ធ្លាប់បានឆ្លើយតបនឹងបញ្ហាទាំងនេះថា ការណ៍ដែលកម្ពុជាធ្វើយ៉ាងដូច្នេះ គឺដើម្បីជាហេតុផល មនុស្សធម៌ មេត្តាធម៌‍ តែប៉ុណ្ណោះ ៕