មន្ត្រី CNRP ៥រូបចេញមុខភ្នាល់ជាមួយ ហ៊ុន សែន ទៀតហើយ ម្នាក់១០០០ដុល្លារ

November 11, 2017

មន្រ្តីរបស់គណគណបក្សសង្រ្គោះជាតិចំនួន៥រូប បានប្រកាសពីការហ៊ានភ្នាល់ជាមួយនឹងលោកនាយករដ្ឋមន្រ្តី ហ៊ុន សែន ករណីរំលាយគណបក្សសង្រ្គោះជាតិ ។ ការចេញមុខភ្នាក់ពីមន្រ្តីទាំង៥រូប នៃគណបក្សប្រឆាំងនេះ គឺបន្ទាប់ពីយុវជនម្នាក់ ដែលបានចេញមុខភ្នាល់ ទល់នឹងលោក ហ៊ុន សែន កាលពីប៉ុន្មានថ្ងៃមុននេះ ។ កាលពីម្សិលិញនេះ មន្ត្រី និងជាសកម្មជនមកពីគណបក្សប្រឆាំង ចំនួន៥នាក់ទៀត បានប្រកាសភ្នាល់ ជាមួយលោកនាយករដ្ឋមន្ត្រី ដោយដាក់ទឹកប្រាក់ ក្នុងម្នាក់១០០០ដុល្លារ។ មន្ត្រីទាំង៥រូបនោះ រួមមានលោក ហេង ដាណារ៉ូ សមាជិកសភា និងជាតំណាងរាស្ត្រមណ្ឌលព្រៃវែង - លោក ញឹម គឹមញ៉ុល អនុប្រធានក្រុមការងារ ព្រះសីហនុ , លោក សុភ័ណ្ឌ ឡារី សមាជិកក្រុមការងារ កំពង់ចាម ,លោក សួន ចំរើន សមាជិកក្រុមការងារ បាត់ដំបង និងលោក អែម ប៊ុនណារិទ្ធ សមាជិកក្រុមការងារ ពោធិ៍សាត់។

កាលពីថ្ងៃពុធ ទី៨ ខែវិច្ឆិកា ប្រមុខដឹកនាំរដ្ឋាភិបាលកម្ពុជា គឺលោកនាយករដ្ឋមន្ត្រី ហ៊ុន សែន បានប្រកាសពីបំណងនៃការដាក់ប្រទេសកម្ពុជា ឲ្យបើកលេងល្បែងភ្នាល់ ជាទូទៅមួយ ដែលមានរូបលោក ជាមេស៊ីសង។ ថ្លែងនៅចំពោះកម្មករកម្មការិនី ច្រើនពាន់នាក់ ក្នុងខណ្ឌដង្កោ រាជធានីភ្នំពេញ លោក ហ៊ុន សែន បានប្រាប់ឲ្យគេឯងភ្នាល់ ចំពោះការរំលាយគណបក្សសង្គ្រោះជាតិ នៅថ្ងៃទី១៦ ខែវិច្ឆិកាខាងមុខ នៅពេលដែលតុលាការកំពូល នឹងបើកសវនាការ លើបណ្តឹងរំលាយគណបក្សជំទាស់ ដែលគេស្គាល់ថា ជាគូប្រជែងដ៏ធំតែមួយគត់ របស់គណបក្សប្រជាជនកម្ពុជារបស់លោក ក្នុងពេលបោះឆ្នោតជាតិ ឆ្នាំ២០១៨។

លោក ហ៊ុន សែន ថ្លែងបែបនេះ «អ្នកដែលចង់ភ្នាល់ ក៏ភ្នាល់ទៅ មួយចាក់មួយរយទៅ គឺអារំលាយ ឬមិនរំលាយហ្នឹង។ តាមហាងគុយទាវ នាំគ្នាចាក់ទៅ! ទៅ! បើកម៉ាសេរី ឲ្យនាំគ្នាចាក់! បើ[មិន]រំលាយ ឲ្យមកទារលុយពីខ្ញុំ (...) ឥឡូវចាក់ភ្នាល់ទៅ! បើរំលាយស៊ីតែ ១ទេ បើអត់រំលាយសង១០០។ អ្នកណាចាញ់ មកទារពីខ្ញុំ។»។ យ៉ាងហោចណាស់ ក៏ការប្រកាសនោះ របស់លោក ហ៊ុន សែន ត្រូវបានយុវជនម្នាក់ ឈ្មោះ សាន ប៊ុនឆាយ ចេញមុខកាលពីម្សិលម៉ិញ មកភ្នាល់ទល់នឹងលោក ដោយដាក់ទឹកប្រាក់ ១០០០ដុល្លារ។ យុវជនថា បើគណបក្សសង្គ្រោះជាតិត្រូវបានរំលាយ លោកនឹងផ្ញើរ១០០០ដុល្លារ ជូនលោកនាយករដ្ឋមន្ត្រី តាមវីង (Wing)។ តែបើគណបក្សប្រឆាំង នៅជ្រងរៗដដែលទេ លោក ប៊ុនឆាយ ថាលោក ហ៊ុន សែន ត្រូវសងថ្លៃភ្នាល់ចាញ់ ចំនួន ១០០ ០០០ដុល្លារ ឲ្យមកលោកវិញ។

ចំណែកនៅថ្ងៃម្សិលមិញនេះ លោក សុភ័ណ្ឌ ឡារី ថ្លែងបែបនេះតបទៅលោក ហ៊ុន សែន វិញ « សូមប្រកាសភ្នាល់ជាមួយ សម្តេច ហ៊ុន សែន តំណាងរាស្រ្ត និងសកម្មជន គណបក្សសង្រ្គោះជាតិ មាន # ឯកឧត្ដម ហេង ដាណារ៉ូ សមាជិករដ្ឋសភា, លោក ញឹម គឹមញ៉ុល អនុប្រធានក្រុមការងារ ព្រះសីហនុ , លោក សុភ័ណ្ឌ ឡារី សមាជិកក្រុមការងារ កំពង់ចាម ,លោក សួន ចំរើន សមាជិកក្រុមការងារ បាត់ដំបង , លោក អែម ប៊ុនណារិទ្ធ សមាជិកក្រុមការងារ ពោធិ៍សាត់ ។តាមពិតយើងខ្ញុំទាំងអស់គ្នាមិនចេះលេងល្បែងទេ តែសម្តេចបបួលហើយក៏សាកមួយក្តារទៅ បងប្អូន !យើងខ្ញុំ សូមប្រកាសភ្នាល់ជាមួយសម្តេច ហ៊ុន សែន ចំនួនទឹកប្រាក់ 5000$ (ក្នុងម្នាក់ 1000$) គឺយកខាង មិនអាចរំលាយសង្រ្គោះជាតិបានឡើយនៅថ្ងៃទី១៦,១១,២០១៧នេះ សូមសម្តេច ហ៊ុន សែនជ្រាប និងជួយប្រាប់ពីរបៀបទូទាត់ថវិកាផង ។ សូមអរគុណ » ។

ព្រះអង្គ ប៊ុត ប៊ុនតិញ ដែលកំពុងមានព្រះវត្តមានគង់នៅលើទឹកដីនៃសហរដ្ឋអាមេរិកនៅឡើយ មិនបានមានព្រះថេរដីការច្រើននោះទេលើករណីនេះ ប៉ុន្តែព្រះអង្គចាត់ទុកថា នេះគឺជាល្បែងនយោបាយរបស់អ្នកនយោបាយប៉ុណ្ណោះ ។ ព្រះអង្គបានបិណ្ឌបាតថា កុំយកជាតិមកធ្វើជាល្បែងភ្នាល់គ្នា លែងអី ។ ទន្ទឹមនឹងនេះ ព្រះអង្គ ប៊ុត ប៊ុនតិញ ក៏បានអំពាវនាវបិណ្ឌបាតដល់ពលរដ្ឋខ្មែរដែរថា កុំអោយចូល លេងល្បែងនយោបាយដែលគេកំពុងតែលេងនេះ ប្រយ័ត្នមានបញ្ហាកាន់តែធ្ងន់ថែមទៀត ។ ព្រះ អង្គបញ្ជាក់អោយដឹងបែបនេះ ៖ « កុំយកជាតិមកធ្វើជាល្បែង ហើយកុំលែងល្បែងជាមួយពួកកាន់អំណាច » ។

តាមរយៈវីដេអូឃ្លីប ដែលធ្វើឡើងកាលពីប៉ុន្មានថ្ងៃមុននេះ ព្រះអង្គ ប៊ុត ប៊ុនតិញ លើកឡើងបញ្ជាក់ទៀតថា នេះគឺជាទង្វើអាក្រក់ដែលចង់យកជាតិរបស់ខ្លួនឯងមកធ្វើជាល្បែងភ្នាល់គ្នា ។ព្រះអង្គបានបញ្ជាក់ ថា ពលរដ្ឋខ្មែរគួរជៀសចេញពីល្បែងបែបនេះ ព្រោះមិនចំណេញដល់ជាតិសោះឡើយ ៕