អ្នកលេងហ្វេសប៊ុកទម្លាយថា ជំនួយការលោក ហ៊ុន សែន ជាក្រុមអ្នកលួចហ្វេសប៊ុក Hacker

ក្រុមអ្នកលេងហ្វេសប៊ុក បានធ្វើការទម្លាយអោយដឹងថា អ្នកដែលតែងតែបានលួចយកហ្វេសប៊ុករបស់សកម្មជននយោបាយ អ្នកនយោបាយ ហ្វេសប៊ុករបស់គណបក្សនយោបាយ និងសកម្មជន សង្គមកន្លងមកនោះ គឺជាជំនួយការរបស់លោកនាយករដ្ឋមន្រ្តី ហ៊ុន សែន ដែលមានឈ្មោះ ដួង តារា ។ លោក ឆាំ ឆានី សកម្មជនហ្វេសប៊ុកដែលតែងតែវាយប្រហារលើរដ្ឋាភិបាលកម្ពុជាដោយ ឥតសំចៃមាត់ស្ទើរគ្មានចន្លោះនោះ បានបញ្ជាក់ថា លោក ដួង រារា គឺជាអ្នកគ្រប់គ្រងហ្វេសប៊ុករបស់លោកនាយករដ្ឋមន្រ្តី ហ៊ុន សែន ដោយផ្ទាល់ ។ លោកអោយដឹងបែបនេះ ៖ « ក្រុមចោរ Hackers របស់ឪអាសីហា ដឹកនាំដោយឈ្មោះ ដូង តារា បានទទួលបញ្ជាពី ហ៊ុន សែន នឹងធ្វើការអុកឡុកហ្វេសប៊ុក នៅក្រោយពិធីបុណ្យអុំទូកចប់។ តាមដំណឹងពីភ្នំពេញមកថា ក្នុងចំណោមក្រុមចោរ Hackers ទាំងនេះ មានឈ្មោះ ដួង តារា អ្នកកាន់កាប់ Admin ទំពរហ្វេសប៊ុក ហ៊ុន សែន ក្នុងចំណោម ៦ នាក់ទៀត ហើយមានម្នាក់ទៀត ឈ្មោះ ពិសិដ្ឋ នៅស្រុកបារាំង ជាប៉ូលីសអាំងទែប៉ូល របស់បារាំង ត្រូវជាក្មួយប្រសារ ស ខេង » ។ យ៉ាងណានេះគឺជាការលើកឡើងរបស់លោក ឆាំ ឆានី តែម្ដងប៉ុណ្ណោះ ។ ចំពោះរឿងរ៉ាវនេះថា ពិតឬមិនពិតនោះ នឹងរងចាំការបកស្រាយពីលោក ដួង តារា ដែលជាសាម៉ីខ្លួនដោយផ្ទាល់នៅពេល ក្រោយ ៕ សូមបញ្ជាក់ថា កន្លងមក ធ្លាប់មានករណីនៃការលួចហ្វេសប៊ុកកើតឡើងជាញឹកញាប់សម្រាប់មន្រ្តីរបស់គណបក្សប្រឆាំង និងសកម្មជនជាច្រើនរូបទៀត ។ ជាពិសេសអ្នកដែលធ្វើកិច្ចការងារទាក់ទងជាមួយនឹងសង្គម ​។ ក៏ប៉ុន្តែគេមិនបានដឹងឡើយថា តើជនណា ឬក៏ក្រុមណាមួយដែលជាអ្នកលួចនោះទេ ។ រហូតមកទល់នឹងពេលនេះ ទើបមានការចោទប្រកាន់ពីសកម្មជនហ្វេសប៊ុក លោក ឆាំ ឆានី ទៅលើលោក ដួង តារ៉ា ដែលជាជំនួយការរបស់លោកនាយករដ្ឋមន្រ្តី ហ៊ុន សែន ជាអ្នកគ្រប់គ្រងហ្វេសប៊ុករបស់លោក ហ៊ុន សែន និងជាមន្រ្តីនៅទីស្ដីការគណៈរដ្ឋមន្រ្តីផងដែរ។